Sorkar laipuiin foreign mite a ngaimawh

Assam reserve forest-a foreign mite an awm nia sawi chu sorkar laipui chuan a ngaihmawh thu tarlangin, chhuichiantir a tum.

Ministry of Home Affairs (MHA) official chuan phalna nei lo rampawn mite'n ramri kana India an luhrukna hmun leh ramri hung lohna hmunahte a vengtu sipai dah dan a ngaihtuah mek, a ti.

MHA official chuan Assam reserve forest-ah foreign mite luhruk thu an dawng tih sawiin, thil pawi tak a nih thu a tarlang.

"Tribal leh Adivasi te'n reserve forest hi an luah ṭhin a, mahse tunah phal­na nei lo foreign mi an awm a nih chuan ngaih­thah theih a ni lo," a ti.

Official chuan state ṭhenkhatin phalna nei lo foreign mi an thawnkirte an nih a rin thu sawiin, Assam-ah chuan foreign mi ṭhenkhatin in hmun neihna lehkha an nei tih report an dawn thu a sawi a, hei vang hian sorkar laipui chuan chhuichian a duh a ni, a ti.

Official chuan phalna nei loa ramri kân ṭhinte ven nana sorkar laipui hmalakna tarlangin, India-Bangladesh ramri chu kharphui ṭep tawh a ni, a ti a, Assam-Bangladesh ramri bakah Meghalaya-Bangladesh-ah te Border Security Force (BSF) battalion khat ve ve dah an ni dawn tih a sawi.