Union budget-ah khuarel chhiatna vanga harsatna tawk Assam leh Sikkim state tan sum dah hrang

Union finance minister Nirmala Sitharaman-i'n Thawhlehnia union budget 2024-25 a pharhah Assam-a tuilian danna siam nan budget-ah pawisa a dah hrang. Hemi bakah hian hmarchhak state, khuarel chhiatna thleng ṭhin vanga harsatna tawk, Sikkim chu a ṭul angin an pui dawn tih a sawilang bawk.

Nirmala Sitharaman chuan a budget speech-ah,"Brahmaputra leh a fintu lui, India ram chhung leh pawna mi vangin Assam hian kum tin tuilian vangin harsatna a tawk a ni. Tuilian danna siam nan leh a kaihhnawih project dang thawh nan Assam hi ṭanpuina kan pe dawn a ni" a ti. FM Sitharaman chuan sabereka-khuang-kaih leh leimin vanga chhiatna tam tak thlenna, Sikkim chu sorkar laipui chuan a ṭanpui dawn tih sawiin "Sikkim hian ngai a awh leh theih nan kan ṭanpui dawn a ni" a ti bawk. Sikkim leh Assam bakah hian India state dang pahnih, khuarel chhiatna vanga harsatna tawk Himachal Pradesh leh Uttarakhand ṭanpui nan budget-ah hian sum dah hran a ni bawk.

Assam chief minister Himanta Biswa Sarma chuan budget pharh thara tuilian vanga Assam-a harsatna thleng ṭhin sutkianna tur sum ruahman a ni chu lawmawm a tih thu a sawi. Budget-a sum dah hran hmangin tuilian vanga harsatna an tawh ṭhin chu a ziaawm phah ngei a beisei thu a sawi bawk. CM Sarma hian budget pumpui chu India ram ṭhan zel nan ṭha tawk hlein a hria a, India chu khawvel ram zinga sum leh pai dinhmun ṭha ber pathumnaa hlangkai turin budget chu a ṭha tawk a ni, a ti bawk.

Sikkim chief minister Prem Singh Tamang pawhin sorkar laipui hnenah lawmthu sawiin chhawmdawlna sum an dawn tur chu Sikkim tan a pawimawh takzet tih a sawi. PS Tamang chuan khuarel chhiatna nghawng laka an state in ngai a awh leh thuai theih nan ṭanpuina sum an dawn tur chu a ṭangkai dawn a ni, a ti. Budget thar chuan a huapzo hle a ni tiin ṭhalai, dinhmun hniam zawkte leh loneitute chu budget thar chuan a ṭha zawngin a nghawng ngei a beisei tih a sawi.