Tripura : BJP-in chuhtu awm loin panchayat seat 4805-ah hnehna chang

Tripura State Election Commission (SEC) chuan panchayat seat 4,805-ah BJP chu chuhtu awm loin an tling tih a puang. Tripura-ah hian panchayat chhawng thum - gram panchayats, panchayat samitis leh zilla parishads a mipuite aiawh thlan nan August 8 hian vote thlak a ni ang.

Gram panchayats, panchayat samitis leh zilla parishad-ah hian seat 6,889 awmin heng zinga seat 4,805-ah BJP chuan chuhtu awm loin hnehna an chang nghal a ni. Gram panchayat bika seat awm zat 6,370-a seat 4,550-ah BJP in hnehna an chang a, hei hi seat awm zawng zawng aṭanga 71% vel a tling. State Election Commission (SEC) Secretary Asit Kumar Das chuan gram panchayat seat 1,819 ah inthlan neih a ni dawn tih sawiin, heng zinga 1,809-ah BJP chuan candidate an nei tih a tarlang bawk. BJP thawhpui Tipra Motha chuan candidate 138 an nei ve bawk.

Panchayat samiti-a seat awm zawng zawng chu 423 niin BJP chuan chuhtu awm loin seat 235-ah hnehna an chang a, hei hi 55% a tling tih Das chuan a sawi bawk. Zilla parishad-a seat 116 awm aṭangin BJP hian seat 20-ah hnehna an chang tawh a, seat 96 atana inthlan neihna turah BJP chuan candidate an dah vek bawk a ni. Panchayat chhawng thum inthlan hnuhnung berah khan BJP hian chuhtu awm loin 96 % seat-ah hnehna an chang a ni.