Manipur : Kristiante laka buaina thlen lo turin Arambai Tenggol hriattir

National Socialist Council of Nagaland- Isak Muivah (NSCN-IM) chuan Manipur buaina chu an ngaihven reng tih sawiin Meitei kalfawr pawl, Arambai Tenggol chu Kristiante chunga hleihlenna lantir ṭhin leh tharum hmanga bei ṭhin a ni, an ti. Hetiang a nih vang hian Arambai Tenggol chu Kristiante laka buaina thlen tawh lo turin NSCN-IM chuan an chah a ni.

Meitei leh Kuki-Zo hnam inkara buaina a inṭan aṭangin NSCN-IM chuan chet la loin an thlithlai reng tih an sawi a, nitina thil thlen dan bengkhawn reng mah se ṭan lam an nei lo tih an sawi. "Tun dinhmunah chuan buaina hi a ṭha lam zawngin a inher lo tih kan hria, tualchhunga kalfawr pawl Arambai Tenggol chuan Kristiante chungah tihduhdahna leh tharum thawhna an thlen ṭhin a ni. He pawl hian Kristiante an ngaithei lo hle a, an ngaihtuahna leh thil tihah a lang chhuak a ni. Kristiante humhim chu NSCN mawhphurhna a ni" an ti.

Arambai Tenggol chungchang sawi chhunzawm zelin, an pawl chuan khawtlang nun leh politics virvelah thil thlakthleng nan tharum hman an hreh lo a, remna daltu an ni, tiin NSCN-IM chuan a tarlang. NSCN-IM chuan Arambai Tenggol chu Kristiante laka an rilru puthmang thlengin thlak danglam turin an duh tih an sawi. Manipur chhunga sakhaw hrang hrang zuitute inngeih taka an awm chu an duh ber a ni, tiin an tarlang.