Arunachal : Check gate 22-ah AI thiamnaa thuam CCTV hmang

Arunachal Pradesh home minister Mama Natung chuan state chhunga check gate 22-ah AI-based CCTV camera hman a ni tih Thawhlehni khan a sawi. Hemi bakah hian check gate 30 chu dan phal loh bungrua lakluh a nih loh nan uluk taka vil a ni, a ti bawk.

Check gate 22-a AI thiamna a thuam, CCTV camera dah hi state pawn lam aṭanga dan phal loh thil lakluh enfiah nan leh a luhna kalkawnga hman a nih loh nana hma lakna a ni. Home Minister Natung chuan Arunachal luhkaah hian infrastucture ṭha a pawimawh bakah mipuite himna ngaih pawimawh a nih thu a sawi. Arunachal chhunga check gate 30-ah ruihhlo leh dan phal loh thildang a luh loh nan uluk taka endikna kalpui ṭhin a ni, a ti.

Minister chuan state chhung himna an ngai pawimawh tih sawiin police indaih lohna phuhru turin police 3000 lak belh chu cabinet in a pawm tawh niin a sawi. Police station cheihnum kawnga harsatna an tawh sawi lang bawkin ram chungchangah harsatna an tawk ṭhin tih a sawi a, Nagaland ramri depa awm Pumao circle police station pawh he an buaina vang hian chei ṭhat theih lohin a awm tih a sawi.