Nagaland Governor-in special session a ko

Nagaland-a rorellai Naga Peoples' Front (NPF) party buaina vang­a special session ko tura vawi eng emaw zat ngen a nih hnuah Naga­land Governor P.B. Acharya chuan rorellai sor­kar fiah nan February 5 hian special session a ko.

Nagaland Legislative Assembly special secretary A.E.Lotha chuan special session chu India danpui, Article 174 Clause (I) tlawhchhana koh a ni, a ti.

NLA special secretary Lotha-a'n hriattirna dang a tihchhuahah NCP vice president T.L. Semdok chuan L. Khumo chu NCP Chief Whip atana ruat tih a tarlang a, Nagaland JD(U) party president Mhonjan Lotha-a'n JD (U) Party Chief Whip atan B.S. Nganlang Phom a ruat thu a tarlang bawk.

NPF buaina vang hian Nagaland canbinet chuan January 15 khan special session ko turin Governor Acharya an lo ngen tawh a ni.

Nagaland Legislative Assembly-a Chief Minister TR Zeliang kaih­hruai sorkar fiahna turah Zeliang hian thlawptu MLA 25 a nei a, NPF MLA lungawi lo pawl hruaitu, G Kaito Aye-a'n thlawptu MLA 22 a nei thung.

MLA pali neitu BJP chuan an thlawp tur lam an la puang lo a, MLA pariat neitu Congress party pawhin an vote lam tur an la puang lo bawk.

NPF MLA lungawi lo pawlte chuan thuchhuah an siamah Governor-in special session a ko chu lawmawm an tih thu an tarlang a, mipuite duh­thlanna chu humhim a nih zel theih nan democracy kalphung humhalh a nih zel an beisei thu an sawi.

NPF MLA lungawi lo pawlte hian PHE Minister bang ta, Noke Wangnao chu president atan an thlang a, party legislature hruai­tu atan Industries & Commerce Minister bang ta, G Kaito Aye an thlang bawk.