ONGC-in Tripura-ah gas supply a tan
Oil and Natural Gas Corporation (ONGC) chuan 101 MW Monarchak thermal power project hman atan gas a pe ṭan.
Gas hmang Monarchak power plant hi Union Power ministry hnuaiah North Eastern Electric Power Corporation (NEEPCO)-in a enkawl a, Agartala aṭangin chhim lamah kilometre 70-a hlaah a awm a, India-Bangladesh ramri aṭangin kilometre riat chauha thui a ni.
ONGC senior official chuan a enchhinna atan Pathianni zan aṭang khan Monarchak power plant-ah gas supply an ṭan thu sawiin, gas pekna tur khawlte endik a nih hnuah pangngai taka pekchhuah an tum thu a sawi.
"ONGC chuan Tripura khawthlang lam, Khedabari-a gas a chhekkhawlna hmun aṭangin kilometre 10-a thui gas pipeline a siam a, ni khatah gas cubic metre nuai nga pek kan tum a ni," a ti.
Monarchak power plant hotu SR Biswas chuan ONGC aṭanga gas an mamawh zat an hmu thei a nih chuan March thla aṭanga power siamchhuah an ṭan theih a beisei thu a sawi.
Biswas chuan ONGC te'n gas an pek theih loh avangin thla khatah cheng vaibelchhe nga an hloh thu a sawi bawk. Tripura Power Minister Manik Dey chuan Pathianni khan Monarchak power plant a tlawh bawk a, NEEPCO-in power plant aṭanga power an siamchhuah thuai theih loh vanga a lawm loh thu a sawi.
Tripura Power Minister chuan Monarchak power plant siam nan kum 2002, March thlaah lung phum a nih thu a sawi a, hemi atan hian state sorkar chuan kum 2003 khan ram a pek thu leh kum 12 a liam hnuah pawh power siamchhuah ṭan a nih loh thu a sawi. A tira ruahmanna ang chuan power plant hi kum 2005-a peihfel tura ruahman a ni.
Power plant atana hman tur turbine hi US-a General Electric Company siam a ni a, Bharat Heavy Electric Limited-in a supply thung. Gas turbine hmangin power MW 62 leh steam turbine aṭangin power MW 39 siamchhuah beisei a ni.