Guwahati journalist kutthlak dan chhui chiang dawn
Assam Chief Minister Tarun Gogoi chuan kar kalta Inrinnia Guwahati, Latasil Police station-a police te'n DY365 news reporter pahnih kut an thlak nia sawi chu additional chief secretary kaihhruainaah chhuichiang turin thu a pe.
Guwahati journalist te chuan kar kalta Inrinni tlai vek khan thilthleng avanga an lungawi lohna lantirin police station kawtah nawrh an lo huaihawt tawh bawk. Latasil Police station-a Journalist te hian pawikhawihtu hrem phutin Thawhṭanni khan state secretariat kawtah nawrh huaihawt an tum leh a, police te chuan nawrh huaihawt tum journalist 30 rualte hi manin, an zingah hian DY365 Managing Editor Pranay Bordoloi pawh a tel. Latasil Police station "Chief Minister-in thilthleng chhuichiang tura a tih hi kan lawm hle a, mahse kan reporter kutthlaktu police officer pahnihte hrem an nih theih nan kan bei chhunzawm zel ang," tiin Bordoloi chuan a sawi.
Police te'n man chawiin an quarter midang an luahtir nia sawi chhuichian tumin DY365 news reporter hmeichhe pakhat leh a cameraman chuan Inrinni khan Gauhati High Court bula, Latasil Police station-ah an kal a, police station chhevela thla an lak kual hnuah police officer pahnih, Chidananda Bora leh SI Samsuddin Ahmed te'n mawi lo takin an lo khawih niin FIR an thehluhah an tarlang.
Guwahati Police Commissioner Jyotirmoy Chakravarty chuan police officer pahnihte hi an mawhphurhna a hlihsak tawh thu leh ACP-in a chhuichian tur thu a sawi bawk.
Chief Minister Office-in hemi chungchanga thuchhuah a siamah journalist pahnih chunga thilthleng chu additional chief secretary Rajiv Bora kaihhruaina hnuaiah chhui a ni ang, a ti a, thla khat chhunga report thehlut tura beisei a ni, a ti.