BJP-in Delhi-a hmarchhak mite Rampawn aṭanga pêmlut a ti Union Minister Rijiju-a'n chhut sual palh a ti

Delhi Assembly inthlan neih tur atana Bharatiya Janata Party (BJP)-in an hmathlirte an tarlanna, ‘Vision Document’ an tihchhuahah Delhi-a hmarchhak mite chu rampawn aṭanga pêmlut (immigrants) tiin a tarlang a, hei hian sawisel a hlawh hle.

BJP chuan Thawhlehni khan phek 24-a chhah vision document hi a tlangzarh a, Delhi-a hmarchhak mite hamṭhatna atana an hmachhawpte an tarlannaah hmarchhak mite chu rampawn aṭanga pemlut tiin an tarlang. "Rampawn aṭanga pêmlut hmarchhak mite chu venhim an ni ang," (North Eastern Immigrants to be protected) tiin thupui an dah a, 'immigrants tih hi rampawn aṭanga pêmlut tihna a ni a, thupui hnuaia an sawi­fiahna chuan pêm (migrants) tiin an dah thung.

BJP chuan an thil tih hi sawifiah nghalin, chhut sual palh a ni, an ti a, social media-a sawisel a nih hnuah tihdikna an siam nghal.

BJP thil tihsual chung­changah hmarchhak biala pawl hrang hrangte chuan an lungawi loh thu an tarlang nghal bawk. All Assam Students’ Union (AASU) chuan BJP thiltih chu mawlna chi khat a ni a ti a, ngaihdam dil tura an phut thu an tarlang.

AASU president leh general secretary Sankar Prasad Roy leh Tapan Gogoi chuan thu­chhuah an siamah BJP thiltih chu hmarchhak mite hmuhsitna nasa tak a ni, an ti a, BJP party hruaitute'n hmarchhak an hriat­chian loh zia a tilang chiang hle, a ti.

Central-a eptu party Congress pawhin BJP thiltih chu nasa takin a sawisel nghal a, Delhi-a Congress hruaitu Ajay Maken chuan, "BJP hian hmarchhak hi India ram tiin a sawi duh lo a mi?" a ti a, BJP chu an thiltihsual tidik tur leh rampum mipuite hmaa thupha chawi turin a phut bawk.

BJP thupuangtu MJ Akbar pawhin hmarchhak mite sawi nana "immigrant" tih an hmang chu an siamṭhat tawh thu sawiin, tihsual palh a ni, a ti.

"Hmarchhak kan unaute hi Delhi pawhin a chhuang tak zet a, kan thu hman hi tihsual palh liau liau a ni. Immigrant tih chu kan thlak tawh a, ka sawi nawn leh duh chu hmarchhak mite hamṭhatna leh himna hi Delhi mipuite tlukin a pawimawh a ni," tiin Akbar chuan a sawi.

Arunachal Pradesh MP, Union Minister of State for Home Kiren Rijiju pawhin BJP thiltih chu tihsual palh a ni, a ti a, chhut sual palh a nih thu leh siamṭhat a nih tawh thu a sawi bawk.