Foreigner tribunal hnathawh danah sorkar lungawi lo

Union Minister for Law and Justice DV Sadananda Gowda chuan Assam-a foreigner tribunal hnathawh dan chu lungawi thlak a tih loh thu a sawi a, a ministry chuan ṭangkai zawka tribunal hman a nih theih nan theihtawp a chhuah tur thu a sawi.

Union Minister Gowda chuan he thu hi Thawhlehni khan Guwahati-a BJP head office-ah a sawi a, foreigner chung­chang chu Assam tan a pawi­mawh avangin foreigners tribunal chak tak an mamawh thu a sawi a, foreign tribunal-a hnaruak te chu a rang lama hnawh khah a nih tur thu a sawi.

Gowda chuan a ministry-in judiciary tihchangtlun chu a ngaihpawimawh thu sawiin, infrastructure lam pawh theihtawp chhuaha bawhzui zel a tum thu a sawi bawk.

"Judiciary tihchangtlun nana court digitalised kalpui mek chu March thla tawp hian peihfel hman beisei a ni a, Assam-a court te chu e-court an ni tawh ang," tiin Gowda chuan a sawi bawk.

Union Minister Gowda chuan Union Law Ministry aṭamnga fund an pekte chu Assam sorkarin a hman ṭhat loh thu a sawi bawk. "Assam-in Central fund a hman dan hi a lungawi thlak loh hle a, 13th Finance Commission hnuaiah Assam tan cheng vaibelchhe 120 rua­hman a ni a, mahse cheng vaibelchhe 26 chauh pekchhuah a ni a, hemi aṭang hian Assam chuan vaibelchhe 8.14 chauh a hmangral a ni," a ti.

Gowda chuan khua leh tui zawng zawng te'n rorelna dik an neih theih nan thubuai awmte court-in a rang lama a chinfel a ngaih thu a sawi bawk a, India rama thubuai chinfel loh tam tak awmte chinfel nan judiciary kalphung tihchangtlun a ngai a ni, a ti.