UCM-in Manipur-ah darkar 12 awh bandh an huaihawt
Manipur, Chandel district-a Tengnoupal Village Authority te'n National Highway 102, Imphal leh Moreh inkalpawhna area-a kar kalta Zirtawpni aṭanga tiamchin awm loa bandh an huaihawt an thlawpna atan United Committee Manipur (UCM) chuan nimin khan Manipur state pumah darkar 12 awh bandh an huaihawt.
UCM president Y Nabachandra chuan Imphal-Moreh inkalpawhna chu kawngpui pawimawh tak a nih thu sawiin, Tengoupal khaw mipuite mai ni lo, he kawnga kal ṭhinte pawhin Assam Rifle te lakah harsatna an tawh ṭhin thu a sawi.
Tengnoupal Village Authority chuan an khua leh a chhehvela sorkarin Assam Rifles a dahte lakchhuah phutin January 30 aṭangin tiam chin nei lo bandh an huaihawt a ni.
UCM president Nabachandra chuan Chandel district-a Tengnoupal village authority te hmalakna chu UCM-in thlawp zel a tum thu a sawi bawk.
Tengnoupal Village Authority-in Chandel district, Imphal-Moreh kawngpui area-a bandh a huaihawt hi Thawhlehni khan joint action committee din a nih hnuah khauh zawka kalpui a ni. Molnoi-a Kuki Women’s Human Right te, Chandel-a Thadou Student’s Association (TSA) leh Molnoi Area Welfare Committee te chuan bandh hi an thlawp thu an tarlang a, Kuki Students Organisation (KSO) pawhin an thlawp thu an lo tarlang tawh bawk.
Tengnoupal khaw mipuite chuan Imphal-Moreh kawngpui, NH-102 ah hian sit-in protest an la neih chhunzawm zel. Bandh vang hian thil duhawm lo thleng hriat a ni lo.