Tuki-a'n schemes leh project kalpui mekte ennawn

Arunachal Pradesh Chief Minister Nabam Tuki chuan Thawhlehni khan district tina Deputy Commissioner (DC) te chu video conferencing hmangin schemes leh project an kalpui mekte ennawna a neihpui.

Meeting-ah hian Chief Secretary, Planning Secretary, Commissioner te leh Secretary te pawh an tel.

State sorkarin chhiah a khawn dan chung­changah Tuki chuan DC te chu an hmalakna hriattir turin a ngen a, chhiah putru ṭhin te ven nana an hmalakna te, kum 2014-15 chhunga chhiah lut tur an beisei zat te leh district-level resource mobilization committee dinna atana an hmalakna te hriattir turin a ngen.

Chief Minister Tuki chuan forest, lottery, hydro power leh lungalhthei laihchhuahna lamah hmalakna lian tham nei lo mah se chhiah lut erawh a pun thu a sawi a, public distribution system (PDS), health leh education bik­ah an hmasawn tarlanna thla tin Chief Secretary hnenah report turin DC te a ngen bawk.

PDS chu a hun taka pekchhuah a pawimawh thu sawiin Tuki chuan fur a tlak dawn vangin mamawh chhek lawk a pawimawh thu a sawi a, sorkar hnathawk te cho phur nan department hna thawk ṭhate hnena chawimawina pe thei tur­in DC te pawh thuneihna pek an ni, a ti.

Tuki chuan district tina health leh education lam hmasawnna atan thuneihna semrual a pawimawh thu a sawi bawk a, DC chu sorkar hna thawk lak phalna pek an nih tur thu a sawi.

Power thlen lohna hmun ramri chheh­vela chengte tan solar power hman dan tur zirchianga report thehlut turin Tuki chuan DC te a ngen bawk.

Arunachal Chief Minister chuan sorkar ram awlte chu a rang lama ngaihvena ṭangkai taka hman a nih tur thu a sawi bawk a, DC te chu thla hnih chhunga district vision document thehlut turin a hriattir bawk.

Thawhlehnia video conferencing neih hian dar kar nga chuang a awh a, meeting chuan district tina DC te nen thla thum hnua video conferencing hmang­a meeting nei tawh turin a rel bawk.