Nagaland CM Zeliang-an fiahna a paltlang

Nagaland a rorellai Naga Peoples' Front (NPF) buaina avanga sorkar fiahna atana nimina special session neiah Chief Minister TR Zeliang-a'n fiahna a paltlang.

Member 60 awmna Nagaland assembly-ah Chief Minister Zeliang chuan vote 59 a hmu a, buaina chhuah chhan leh a laka hel NPF MLA te chuan sorkar fiahnaah hian an vote leh vek a ni.

NPF MLA 22 te chuan Zeliang-a kaihhruai sorkar lakah helin, kumin January 5 khan Chief Minister an thlawpna an hnukdawk a, Industry minister bang ta, G Kaito Aye chu legislature hruaituah thlangin Chief Minister Zeliang-a paihthlaa sorkar siam an tum a ni.

Chief Minister chuan MLA lungawi lote hmalakna avangin NPF MLA paruk chu an mawhphurhna leh chanvo a hlihsak a, hemi hnu hian Zeliang-a laka lungawi lo MLA 11 pawhin chanvo leh mawhphurhna hrang hrang an chan aṭangin banna an thehlut bawk.

Nagaland cabinet chuan buaina chinfelna atana sorkar fiah a nih theih nan January 15 khan special session ko turin Governor P.B. Acharya an lo ngen tawh a ni.

Chief Minister Zeliang chuan, "Thudik chu hai lan a ni ta," tiin vote hmanga fiahna a paltlang hnuah a sawi a, NPF pawl hnih te kara tu pawl zawk nge party dika pawm tur chungchangah Election Commission-in thutlukna a siam thuai loh vanga lawmawm a tih thu a sawi bawk.

Zeliang chuan Nagaland-a sorkar ngel­nghet a awm theih nana a lamah an ṭan avangin Prime Minister Narendra Modi leh BJP hruaitute chu lawmthu a hrilh.

Nimina sorkar fiahnaah hian boruak ṭha lo a thlen rin a nih laiin muanawm takin vote thlak a ni a, Speaker tel loin MLA zawng zawngin Zeliang-a lamah vote an thlak a ni.

NPF kaihhruai Democratic Alliance of Nagaland III (DAN-III) sorkarah hian NPF-in MLA 38 a nei a, NCP leh JD-U MLA pakhat ve ve bakah Independent MLA pasarihin an thlawp a ni.

DAN III sorkar hian Central-ah NDA sorkar thlawp mahse tun ṭuma NPF party buainaah hian Central-a BJP hruaitute chuan Nagaland BJP te chu ṭan lam nei lo awm tur­in a lo hriattir tawh a, mahse nimina sorkar fiahna vote thlakah erawh BJP MLA pa li te chuan Zeliang-a lamah vote an thlak thung.

Chief Minister Zeliang chuan NPF party buaina chu Chief Minister chhuak ta, Lok Sabha MP Neiphiu Rio chawhchhuah niin a sawi a, Rio hian NDA sorkarah a beisei a hmuh loh vangin state politics-a kir leh tumin sorkar a tibuai a ni, a ti.