TAR network-in Assam leh Manipur tel dawn lo

United Nations Economic and Social Commission for Asia and the Pacific (UNESCAP)-in Asia leh Europe khawmualpuia ramte'n sumdawnna leh thawhhona ṭha an neih theihna atana Trans-Asian Railway (TAR) network a rua­hmanah Assam leh Manipur an tel dawn lo.

UNESCAP chuan TAR network atan Asia leh Europe ram 28 aṭangin kilometre 17,500-a thui rel kawng a thlangchhuak a, he rel kawng hi "Yesterday's Silk Road" tiin hming a phuahsak a ni.

Kum 1992 aṭanga Asia leh Europe ramte nasa taka economy-a an ṭhan hnuah TAR network siam duhna a piang a ni. Network peihfel hun tur hi sawi theih a la ni lo a, ram ṭhenkhat inkara rel kawnga inkalpawhna la awm lote siam a ṭul bakah rel kawng awm tawhte siamṭhat a ṭul bawk.

TAR network hi Turkey khawpui, Istanbul aṭanga inṭanin, Iran-ah a lut ang a, Iran aṭang­in Afghanistan a luh hnuah Pakistan khawpui, Islamabad-ah a kal leh ang a, heta ṭang hian New Delhi-ah a lut ang. Afghanistan leh Islamabad inkarah hian rel kawng a la awm lo a, he laiah hian rel kawng thar siam a ngai dawn a ni. New Delhi aṭangin Kolkatta-ah kalin, Bangladesh khawpui, Dhaka-ah a lut leh ang.

India-a Trans-Asian Railway (TAR) network siamna buaipuitute chuan Assam leh Manipur tlawhpawh tir an tum lo nia sawi a ni a, mahse rawtna tharah chuan rel kawng hi Bangladesh khawpui, Dhaka a luh hmain Tripura hmar lam, Jawahar Nagar luhtir tum a ni. Jawahar Nagar aṭangin rel kawng hian Mizoram a lut ang a, Mizoram aṭangin Myanmar, Ka Lay-ah a chhuak ang.

UNESCAP ruahmanna chu a thutlukna tawp a nih loh thu official pakhat chuan a sawi a, bandh leh nawrh hrang hrangin rel kal lai a tihbuai loh nan Assam leh Manipur aiin Tripura leh Mizoram chu rel kaltir nan a thlanawm zawk a ti.

Northeast Frontier Railways-a construction official chuan tunah hian TAR network atana rua­hmanna an lo siam hmasak anga an kal thu a sawi thung a, Imphal aṭanga Myanmar, Tamu inkara rel kawng siamna atan survey an neih mek thu a sawi. Mahse an rua­hmanna chu thutawp a nih loh thu sawiin, Tripura, Jawahar Nagar aṭanga Mizoram, Kolasib kal­tlanga Myanmar luhtir tura rawtna thar a awm thu a sawi bawk.