BJP vision document dodalna a kal zel

Delhi Assembly inthlan neih tur atana BJP-in an hma­thlirte an tarlanna, vision document Thawhlehnia an tih­chhuahah Delhi-a hmarchhak mite chu rampawn aṭanga pêmlut (immigrants) tiin an tarlang a, hei hian hmarchhak mite leh eptu party te a tilungawi lo hle.

BJP-in pêmlut tia hmar­chhak mite a tarlan vang hian hmarchhaka zirlai pawl leh Central-a eptu party hrang hrangte chuan an lungawi loh thu an tarlang nghal a, BJP chu an tihdik loh siamṭha turin an phut. BJP thupuangtu MJ Akbar pawhin hmarchhak mite sawi nana "immigrant" tih an hmang chu an siamṭhat tawh thu leh an tihsual palh a ni, tiin a lo sawi tawh bawk.

BJP thiltih vang lungawi lohna lantirin Nilaini khan Assam, Manipur leh Tripura-a pawl hrang hrangte chuan nawrh an huaihawt zui nghal.

All Assam Students’ Union (AASU) chuan Nilaini tlai khan Assam district hmunpui zawng zawngah 'torchlight procession' huaihawtin, mei eng kengin kawng an zawh a, BJP chuan hmarchhak bial mipuite zahna a nei lo a ni, an ti.

AASU president Sankar Prasad Roy leh general secretary Tapan Kumar Gogoi chuan hmarchhak bial hi BJP-in India rama a ngaihlohna a langchiang hle an ti.

AASU advisor Samujjal Bhattacharyya pawhin BJP chu hmarchhak bial mipuite hmusitah puhin, ngaihdam dil tura a phut thu a sawi.

Assam Pradesh Congress Committee (APCC) pawhin Delhi BJP thiltih dik loh vanga an lungawi loh thu an tarlang bawk a, party block unit te chuan vawiin hian an huam­chhungah ṭheuh lungawi lohna lantir nan programme an buatsaih tur thu an tarlang bawk.

Assam-a tlawmngai pawl langsar tak, Krishak Mukti Sangram Samiti (KMSS) pawhin Nilaini khan nawrh a huaihawt bawk a, Prime Minister Narendra Modi-a lim halin, ngaihdam dil tura BJP an phut thu an tarlang. KMSS chuan hmarchhak mite chu India khua leh tui an nih thu leh foreigner an nih loh an tarlang bawk.

Assam-a eptu party dang- Communist Party of India-Marxist (CPI-M), All India United Democratic Front (AIUDF) leh Aam Admi Party (AAP) te pawhin BJP thiltiha an lungawi loh thu an sawi.

Manipur-a CPI-M pawhin BJP vision document hi an dodal thu tarlangin, India khua leh tuite sawi nan pêmlut tih chu hman theih a nih loh thu an tarlang a, pêmlut tih thumal chu paih an phut thu an tarlang bawk.

Tripura-a rorellai CPI(M) chuan Delhi BJP vision document chu hnuhkir an phut an tarlang a, India khua leh tuite pêm tia sawi chu India mipuite zah lohna a ni, an ti.