M'laya cabinet-in pre-paid system hman rawtna pawm

Meghalaya cabinet chuan Nilaini khan power an hman dana ‘pre-paid metering system’ hman rawtna a pawm.

Chief Minister Mukul Sangma chuan cabinet meeting an neih zawhah he thu hi sawiin, mipuite'n prepaid meter an hman vek theihna atana hmalak nan Meghalaya Power Distribution Corporation Limited (MPDCL) hnenah ṭanpuina sum an pek thu a sawi.

"Meghalaya Energy Corporation Limited (MeECL) hnuaiah pre-paid metering system chu MPDCL-in a kalpui ang," tiin Mukul chuan a sawi a, mipuite'n power supply ṭha taka an neih theih nan leh MPDCL sum lakluh tihpun nan pre-paid system chu hman tum a ni, a ti.

MeECL chuan sorkar department office zawng zawngte pre-paid metering system hmang vek turin state sorkar hnenah rawtna a thlen bawk.

Revenue and Disaster Management in-charge Deputy Chief Minister RC Laloo chuan nikuma chhiatna tawk loneitu pawh State Disaster Relief Funds kaltlanga subsidy pek an nih tur thu a sawi bawk.

Meghalaya Nursing Home Licensing and Registration Rules 2015 chu cabinet meeting-in a pawmpui thu Health and Family Welfare minister AL Hek chuan a sawi bawk a, he dan hi hman ṭan a nih chuan Meghalaya-a nursing home te chuan registration leh license an neih vek a ngai tawh ang.