Union Budget-ah Manipur ngaihthah a ni : Manipur Congress

Manipur chief minister, N Biren Singh chuan union budget 2024-25 a fak laiin, Manipur Congress chuan tuilian leh Meitei-Kuki-Zo inkara buaina vangin state-in harsatna tawk mah se union budget pharh takah BJP sorkar chuan Manipur chu a ngaihthah a ni, a ti thung.

Manipur state Congress president K Meghachandra chuan budget thar chu thlei bik nei a ni tiin, hmarchhak pumpui a ngaihthah niin a sawi. "Tuilian vanga harsatna tawk Assam chu budget tharah tarlan ni mah se kum 20 chhunga tuilian nasa ber ṭum hnih ngawt thlenna leh rial tla vanga buai Manipur ṭanpuina tur a lang lo a, budget thar hian duhsak bik a nei a ni" a ti. Manipur chhunga raltlan 60,000 chuang tana chhawmdawlna pek tur tarlan a ni lo chu pawi a tih thu a sawi bawk. Budget thar hi hmarchhakah mai ni loin India rampumah eptu lam chuan an sawisel nasa hle a, BJP rorelna state duhsak bikah puhin eptu lam chuan Parliament kawtah Nilaini khan lungawi lohna an lantir a ni.

Budget tharah hian khuarel chhiatna vanga harsatna tawk state panga- Bihar, Assam, Himachal Pradesh Uttarakhand leh Sikkim-te tan ṭanpuina sum leh tuilian danna tur siam nan sum dah hran ni mah se Manipur tan erawh a bika sum ruahman a ni lo a, hemi avang hian sawiselna a tam hle a ni. Manipur Lok Sabha MP, Angomcha Bimol Akoijam chuan budget thar chu lungawi thlak a tih loh thu a sawi ve bawk. MP Akoijam hian tuilian tuarte bakah tualchhung buaina vanga tuar mekte hmaih an ni chu hriatthiam harsa a ti a ni.

Congress lamin budget thar hi an sawisel laiin Manipur chief minister N Biren Singh chuan a fak thung. Budget thar hian employment, skilling, MSMEs leh middle class te hmasawnna tur a thlur bing dawn avangin India ṭhan zelnaah a pui dawn niin a sawi. Hmarchhak hmun hrang hrangah India Post Payment Bank in branch 100 hawn belhna tur budget tharah hian ruahman a ni a, thingtlang lam tan pawn awlsam zawkin bank a dawr theih tawh dawn a ni tiin, prime minister Narendra Modi hnenah hmarchhak a ngaihtuah vangin lawmthu a sawi. BJP thupuangtu M Asnikumar chuan ram mipuiten rualkhai taka hmasawnna an neih theihna turin a ni tiin budget thar chu a fak hle bawk. Hamṭhatna awmte chu rualkhai taka sem an tum tih sawiin, zirna leh hriselna kaihhnawih scheme bikah a dawng turte hmaih awm lo turin hma an la dawn tih a tarlang.