Arunachal : Hydel project aṭangin vbc 10,000 hmuh inbeisei

Arunachal Pradesh deputy chief minister leh power minister ni bawk, Chowna Mein chuan state chhunga eng deh chhuah a tam theih nan hma an la mek tih sawiin, hydel project 13 siam mek a ni, a ti. Heng hydel project hi zawh fel a nih hunah chuan state-in kum tin Rs vbc 10,000 a hmu thei dawn niin a sawi.

Arunachal Pradesh chhungah hian hydel project lian tak tak siam hna kalpui mek a ni a, mahse tualchhung miten an dodal vang leh buaina dang vangin hma lakna a chak thei lo ṭhin. Heng harsatna hi tawk mah se power minister Mein chuan Arunachal power department chuan hydro project siamtuten an hnathawh ṭha taka an zawh theih nan an thlawp tlat dawn tih a sawi a ni.

Mein chuan hydel project thawh mek zinga hmanhmawh ngai zual pahnih tarlangin, 2000 MW Lower Subansiri leh 2800 MW Dibang Multipurpose Project-te chu thawh hmanhmawh a ngai a ni, a ti. Arunachal sorkar hian eng siam chhuak tura theihna a neih chhawr ṭangkai tum mah se hemi in a nghawng tur mipuite ngaihtuah chung leh environment ti chhe lo zawngin hma a la mek a ni.

Chowna Mein hian khaw ṭhenkhata eng awm ṭha lo chungchanga mipuite harsatna tawh ṭhin pawh sawilangin, eng awm ṭhat loh chhan chu transmission line thar siam vang a ni tih a sawi. Eng pekchhuahna kawnga thawh tur ṭulte thawh zawh a nih hunah inen chhawk chu a ziaawm dawn tih sawiin, kum 2025 ral hmain transmission line thar siam hi zawh an inbeisei tih a tarlang bawk.