Sikkim : Zirtawpni apiangin pisa hmunah thlai chin leh enkawl hna thawk dawn

Pakyong district, Sikkim-a thuneitute chuan Zirtawpni chu sorkar hnathawk tan 'Field Day'-ah puangin, hemi ni hian pisa chhehvela ram ruakah thawktute chuan thlai chingin, an enkawl zui bawk ang.

Pakyong district chhunga sorkar pisa zawng zawngte tan thuneitute chuan hriattirna hi tichhuakin, Zirtawpni chawhma dar 10 aṭanga tlai dar 4:30 inkarah "Field Day' hi hman a ni ṭhin dawn tih an sawi. He hunah hian sorkar hnathawkte chuan pisa chhehvela ram awlah thlaite chingin an enkawl zui dawn a ni. 'Field Day' hian Pakyong district huam chhunga sorkar pisa bakah BACs, GPUs leh Sub-Division Office te pawh a huam tel dawn a ni.

Sorkar hmalakna hi lo neih kawnga harh tharna an neih theihna tur leh, mipuiten an entawn tura hmalakna a ni. Sorkar pisa-te chuan an thlai chinna hmunah signboard an tar tur a ni a, hetah hian thlai chinna hmun chungchang chipchiar taka tarlan tur a ni. Sorkar pisa ṭhenkhat, thlai chinna hmun nei lote chu an bul hnaia mimal ram ruak chu thlai chinna tur hian dil tura tih an ni bawk.

Sorkar thuchhuak hian Zirtawpniah dam lohna vang a nih loh chuan hnathawkte chu chawlh a remti lo a, hemi ni hian kim taka kal tura beisei a ni. Zirtawpni bikah chuan dam lohna vang a nih loh chuan chawlh an pe dawn lo, phalna hmu hmasa loa kal lote chu hlawh nei loa chawlh la anga chhinchhiah an ni ang. 'Field Day' a kalte chhinchhiahna leh thlalak hi Pakyong additional district collector hnenah thehluh ṭhin tur a ni. Sorkar thupek hi zawm a ni em tih endik ṭhin a ni dawn a, endiktute chuan sawi lawk loin sorkar pisa an tlawh ṭhin dawn a ni.