NEEPCO-in hmarchhaka solar power plant hmasa ber a hawng

North Eastern Electric Power Corporation (NEEPCO) chuan hmar­chhak biala solar power plant hmasa ber leh lian ber, Monarchak, Tripura-a a din chu Nilaini khan a hawng.

NEEPCO general manager SR Biswas chuan solar power plant hian power megawatt nga a siamchhuakh theih thu sawiin, Nilaini khan power siamchhuah ṭan nghal a ni, a ti.

Solar power plant siam nan hian cheng vaibelchhe 40 hman a ni a, power siamchhuah zawng zawng chu Tripura power grid-a thawnluh tur a ni.

Biswas chuan NEEPCO-in Madhya Pradesh-ah 50-MW solar power plant leh Assam, Lanka-ah power megawatt hnih siamchhuak thei solar plant din a tum thu a sawi bawk.

Hetihlai hian Monarchak-a 101-MW thermal power plant hman atan Oil and Natural Gas Corporation Limited (ONGC) chuan February 1, Pathianni zan aṭangin gas a pe ṭan a, power siam­chhuah ṭan nghal a ni bawk. Thermal power plant hi NEEPCO chuan Union power ministry hnuiah tluklehdingawn 9.5 senga a siam a ni a, Tripura khawpui, Agartala aṭangin chhim lamah kilometre 70 vela hla a ni.

Biswas chuan Rokhia leh Baramura-a gas-based power plant pahnihte chu gas hman tipung loin techonology sang zawk hmanga power dehchhuah tihtam nan combine an tum leh, NEEPC leh Tripura sorkarin hemi atan hian cheng vaibelchhe 500 thawh an tum thu a sawi.

Rokhia leh Baramura power plant te hian tunah power MW 103 an siamchhuak mek a, combine cycle mode-a siam an nih chuan power MW 163 a siamchhuak thei dawn a ni.

NEEPCO chuan Dambur hydel power plant-a power siamchhuah pawh MW 8 aṭanga MW 15-a tihpun an tum thu Biswas chuan a sawi bawk. Dambur hydel power plant hi kum 1974-a hawn a ni.