BJP-in Manipur-a president rule puan a rawt
Manipur BJP unit chuan Ningani khan Chief Minister Ibobi Singh kaihhruai sorkar chu rorelnaa hlawhchhamah puhin president rule puan an duh tih an tarlang.
State BJP president Th Chaoba chuan he thu hi press conference-ah sawiin, Manipur-in sum leh paiah harsatna nasa tak a hmachhawn mek, a ti a, state sorkar hnuaiah dan hmanga rorelna a awm lo, a ti.
Chaoba chuan president rule puan an rawt chhan sawiin, state sorkar chu eiruknaah nasa taka a inhnamhnawiha, centrally sponsored scheme-a fund te a tichingpen a nih chuan India danpui hlawhchhamna a ni a, president rule puan theih a ni, a ti.
State BJP president chuan Chief Minister Ibobi kaihhruai sorkar chu Central aṭanga Manipur-in fund a hmuhte hmang ṭha loah puhin, financial year, 2014-15 tawpna atan thla hnih chauh a awm laiin state sorkar chuan sorkar laipui aṭanga plan fund cheng vaibelchhe 3200 a hmuhah 29.25% chauh a hmang a ni, a ti.
"Financial year kal mek tawp nan thla hnih hun a la awm a, state sorkar chuan plan fund a hmuh aṭangin a chanve pawh a la hmang lo a, sum la hman loh vaibelchhe 2545 hi khawiah nge a kal ang?" tiin a zawt.
Chaoba chuan, "Fund la hman lohte chu Chief Minister-in kum kaltaa a lo tih ṭhin danin financial year tawh dawn hnaihah a rukin a lachhuak leh dawn a ni," a ti.
Delhi BJP-in an vision document-a hmarchhak mite pêmlut tia an tarlan chungchangah Manipur unit president chuan BJP thil tihsualah Central-a BJP hruaitute leh Prime Minister Narendra Modi-a'n ngaihdam an dil hnuah pawh political party dangte chuan party beihna remchangah an hmang mai a ni, a ti.