Pre-paid metre vuah mekah mipuite'n duhthlang thei dawn

Itanagar-a pre-paid electric metre vuah mek chu mipuite leh eptu party te'n nasa taka an sawisel hnuah Arunachal Pradesh cabinet chuan ennawnin, pre-paid metre hmang duh lohte tan post-paid metre hman a phalsak.

Chief Secretary Ramesh Negi chuan he thu hi sawiin, state cabinet meeting chuan Itanagar-a Pre-paid Electric Meters (PPEM) hman tur chungchanga mipuite thil ngaihmawh chu a ngaihpawimawh thu sawiin, mipuite hnena duhthlanna siamsak a remti ta a ni, a ti.

PPEM vuah mek hi eptu party te bakah zirlai pawlte leh tlawmngai pawl hrang hrangte chuan an dodal nasa hle a, state BJP pawhin sawifiah tura state sorkar a phut thu a lo tarlang tawh bawk.

Chief Secretary chuan PPEM chu sorkar laipuiin power reform a kalpuinaa a hmalakna zulzuia kalpui a ni, a ti.

Arunachal sorkar chuan PPEM dodaltu pawl hrang hrang hruaitute chu PPEM hman tawhna state- Manipur, Meghalaya leh Tripura-ah an kalpui dan zirchiang tura tour buatsaihsak a tum thu Chief Secretary Negi chuan a sawi bawk.

State Power department chuan cheng vaibelchhe 85 senna tur pre-paid meter project hi, nikum November 10 aṭangin Itanagar-ah a ṭan a, March thlaah meter 3,000 vuah hman tumin hma a la mek.