Assam leh Nagaland-in DC level-a inbiakna an nei

Assam-a Sivasagar district leh Nagaland-a Mokokchung district chuan ramri thubuai chinfel nan Nilaini khan Mokokchung-ah Deputy Commissioner level joint coordination meeting an nei.

Mokokchung DC Sushil Kumar Patel chuan Nagaland lam official te a ho a, Sivasagar DC Virender Mittal-a'n Assam offical te a ho thung.

Mokokchung DC Patel chuan Assam palaite chu lo lawmin, ramri thubuai chinfel nan ramria boruak muan­awm a awm theih nan ramri chhehvela mipuite inkarah inlaichina ṭha siam chu an thil ngaihpawimawh ber a ni, a ti.

Patel chuan district pahnih mipuite inkarah boruak ṭha lo a thlen loh nan pawikhawihna te ṭham tak tak te chu boruak tichhetua hman loh a pawimawh thu a sawi bawk a, inlaichinna leh tawh hona ṭha a awm theih nan ramri chheh­vela district pahnih mipuite inkarah insumdawn tawnna hmunpui siam ṭha a tih thu a sawi bawk.

Sivasagar DC Mittal pawhin Assam leh Nagaland mipuite chu inmamawh tawn an nih thu sawiin, ramri chhevela cheng mipuite inkar­ah inrintawnna lohna te, inrinhlelhna te leh inhriatthiam lohna te a awm loh a pawimawh thu a sawi bawk.

Ramri chhehvel boruak siamṭhatna atana Assam sorkar hmalakna tarlangin Mittal chuan state sorkarin ramri district te tan ‘Outreach Programme’ a buatsaih thu a sawi a, hei hi ramri district-a DC te kaltlangin kalpui a nih tur thu a sawi.

Meeting-ah hian district pahnih police hotu, SP te bakah District Forest Officer te pawh an tel.