Hmarchhaka 'Cultural Property' hmasa ber Moidams

Assam chhunga lal ram ropui tak ni ṭhin, Ahom dynasty hunlaia an inphumna hmun 'Moidams' an tih chu UNESCO World Heritage List-ah telh ni tih World Heritage Committee (WHC) chuan nimin khan a puang. WHC session vawi 46-na hi New Delhi-ah neih mek a ni.

Moidams hi Cultural Property category-ah dah niin, hmarchhak bialah he category aṭanga UNESCO World Heritage List-a telh hmasa ber a ni.

Assam chief minister Himanta Biswa Sarma chuan, 'Cultural Proprety' tihchhuah thara Moidams telh a ni chu lawmawm a tih thu tarlangin, Assam tan ni chhinchhiah tlak tak a nih thu a sawi. Assam mipuite, prime minister Narendra Modi leh UNESCO World Heritage Committee chungah lawmthu a sawi bawk.

Moidams hi Ahom dynasty hunlaia an inphumna hmun a ni a, Archaeological Survey of India (ASI) mi Janhwij Sharma chuan UNESCO heritage tag hmu tura tehna hrang hrang a paltlang tih a sawi a ni. Moidam hi thlan hmun pangngai ang a ni loa, hmun zawl laiah pyramid ang deuhin a pawng a, a hnuai hmun zawl aṭangin a chhung luh theih niin a chhip hi a zawl bawk a ni. UNESCO World Heritage List-a tel tur hian kum 2023-24 khan dilna theh luh a ni.