Meghalaya : Tlawmngai pawlten MRSSA kalpui an tum

Meghalaya chhunga tlawmngai pawl hrang hrangte chuan state sorkarin Meghalaya Residents Safety and Security Act (MRSSA) hman a tum lo a nih chuan anmahni thuin dan an kengkawh dawn tih an sawi.

Tlawmngai pawlte hian state chhung hmun hrang hranga dan loa khawsate chu an dap dawn tih an sawi. Heng pawlah hian - Federation of Khasi Jaintia and Garo People (FKJGP), Khasi Students' Union (KSU), Hynniewtrep National Youth Front (HNYF), Ri Bhoi Youth Federation (RBYF), Jaintia Students' Union (JSU), Garo Students' Union (GSU), Achik Youth Welfare Organization (AYWO) leh Federation for Achik Freedom (FAF) te an tel a ni.

Federation of Khasi Jaintia and Garo People (FKJGP) pisa, Shillong-ah lawmngai pawlte hi inhmukhawmin MRSSA dan chu kum 2016-a pawm ni tawh mah se tun thlengin a taka hman a la ni lo tih an sawi. State sorkar chuan he dan kalpui tumna hi a nei lo niah an ngai a, tun thlengin hmalakna tak tak a la awm lo a ni, an ti. Meghalaya chief minister Conrad K Sangma-a'n MRSSA dan an hman theih loh chhan sawifiah a tumna chu mipui bum tumna mai a nih thu an sawi bawk. Meghalaya leilung fate humhim turin state pawn lam mite lakah khauh lehzuala hma lak a ngai tih tarlangin, state dang aṭanga hnathawk tura lutte work permit leh lehkha pawimawh dangte an endik ṭhin dawn tih an sawi.