Session-a tel turin Kuki-Zo MLA-te keimah ngeiin ka sawm ang : Manipur CM

Manipur chief minister N Biren Singh chuan Kuki-Zo MLA 10-te chu Assembly session lo awm leh tura tel turin amah ngeiin sawmna a pe dawn tih a sawi.

CM Singh hian Ningania thuthar thehdarhtute a kawmnaah he thu hi a sawi a, Kuki-Zo MLA-te chu assembly-a an tel a pawimawh thu leh, anmahni pawhin thawhpui an inpeih thu a sawi. Manipur Legislative Assembly hi July 31 aṭanga August 6 thleng ṭhukhawm tura ruahman a ni. Kuki-Zo MLA 10 zingah hian minister pahnih an awm a, MLA 10-te hian tualchhung buaina a chhuah hnuah an tan Imphal khawpuia kal chu a him lo nia sawiin, Assembly session pahnihah an tel tawh lo a ni.

Manipur CM hian Delhi zin a tum chungchang pawh sawi langin, he hunah hian prime minister Narendra Modi hmuh a tum dawn tih a sawi. NITI Aayog meeting nei turin Delhi a pan dawn a, meeting-ah hian an state in buaina a tawh pawh sawilangin, Manipur tan rah ṭha a chhuah ngei a beisei thu a sawi. Hemi baka PM Modi nen inkawmna hun neih an tum bawk.

Union budget tharah Manipur ngaihthah nia sawi pawh chhang letin Singh chuan politics hmanga inbeihna mai a ni, a ti. "Manipur hian rial leh tuilian vanga chhiatna tawkte chhawmdawl nan Rs vbc 250 a dawng tawh a, mipuite hnenah kan sem chhuak tawh a ni" a ti.