Pêmlut tia sawi chungchangah Bedi lakah thubuai thehlut

Delhi BJP-in an vision document-a hmar­chhak mite pêmlut tia a sawi chungchangah Guwahati-a sumdawng pakhat chuan kar kalta Ningani khan Delhi Chief Minister candidate Kiran Bedi leh party hruaitu pali lakah thubuai a thehlut.

Guwahati sumdawng Arun Pathak chuan Kiran Bedi party hruaitu dang pali te chu ṭawng, hnam leh chenna danglamna vanga chi leh hnam hrang inkara inhuatna thlentirtuah puhin Assam-ah thu­buai a thehlut a, Assam police te chuan Indian Penal Code (IPC) Sec­tion 153A tlawhchhan­in thubuai an ziaklut.

Kiran Bedi bakah BJP hruaitu thubuai siam­sakte hi BJP Delhi president Satish Upadhyay, vision document chair­man Harsh Vardhan, spokesperson Pra­veen Shankar Kapoor leh party Delhi in-charge Prabhat Jha te an ni.

Patak chuan, "Rampawn aṭanga pêmlut (immigrant) tih chu chhutsual palh a ni thei lo. Vision Docu­­ment hi chhiar nawn vek hnua chhut a ni a, hei hi chi inthliarna a ni. India ram state dangte leh hmarchhak mite thliarhranna tizualtu a ni," a ti.

Pathak chuan BJP-in rampawn aṭanga pêmlut tih an siamṭhatna pawh chu chi inthliarna tho a ni, a ti.

BJP hian tihdikna a siamah hmarchhak mite chu "people from the northeast in Delhi" (Delhi-a hmarchhak mite) tiin a dah a ni. Pathak chuan hei pawh rampawn aṭanga pêmlut tia dah nen a inang a ti a, hmar­chhak chu hmarchhak mite chhuahna bul (origin) a nih loh vangin chi inthliarna tho a ni, a ti.

Assam BJP spokesperson Shiladitya Dev chuan Delhi BJP-in an thil tihsual chu pawi an tih thu an tarlang tawh a, an siamṭha tawh bawk a, party dangte dodalna chuan mi timangang lo tak zet a ni, a ti.