BJP vision document dodalna Manipur Congress party-in huaihawt

9th February, 2015

Manipur Pradesh Youth Congress Committee (MPYCC) chuan kar kalta Inrinni khan Delhi BJP-in vision document-a hmarchhak mite pêmlut tia a tarlan vanga lungawi lohna lantirin Imphal-ah nawrh an huaihawt.

Manipur Pradesh Congress Committee, president, Deputy Chief Minister Gaikhangam chuan thu sawiin, BJP thiltih chu mi pangngai tih chi a ni lo a ti a, BJP chuan hmarchhak mite chungah ngaihdam a dil tur a ni, a ti.

"Hetiang thil hi hmarchhak mite thliarhranna a nih avangin BJP chuan a tisual nawn tur a ni lo," a ti.

Gaikhangam chuan state sorkarin sssembly session neih turah Inner Line Permit (ILP) System Bill putluh a tum thu a sawi bawk.

February 2-a Delhi BJP-in assembly inthlan neih tur atana Delhi-a hmarchhak mite tana a hmathlir a tarlannaah hmarchhak mite chu pêmlut tiin a tarlang a, BJP chuan he thil hi an chhut sual palh tiin, February 2 vek khan an siamṭhat thu an lo tarlang tawh a ni.

Manipur Chief Minister Ibobi Singh pawhin assembly session-ah ILP system Bill putluh a nih tur thu hi kar kalta Inrinni khan a sawi.

Manipur sorkar chuan February 25 hian Governor chu assembly thlasik ṭhutkhawm ko turin a ngen a, hetah hian ILP system Bill hi putluh a ni ang.

Chief Minister Ibobi chuan assembly session neih hma hian All-Political Party Committee on Inner Line Permit (ILP) meeting a ko bawk.

All-Political Party Committee on Inner Line Permit (ILP) chuan Deputy Chief Minister Gaikhangam-a kaihhruaina hnuaiah ILP emaw pêmlutte khuahkhirh nan a tlukpui dân siam nan zirchianna a neih hnuah nikum December 10 khan Chief Minister hnenah phek 280-a chhah report a thehlut a, Chief Minister chuan committee rawtna chu state law department hotute rawnin a taka kalpui a nih tur thu a lo tiam a ni.

Manipur-a pêmlutte khuahkhirh nan Joint Committee on Inner Line Permit System (JCILPS) chuan ILP system kalpui phutin nikum khan nasa takin nawrh a huaihawt a, JCILPS thil phut bawhzui nan state sorkar chuan All-Political Party Committee on Inner Line Permit (ILP) a din a ni.