Nagaland, Tuensang buaina chhuakah mi pahnih an thi

Nagaland-a Tuensang district-a hnam pahnih intihbuainaah kar kalta Zirtawpni, February 6 khan mi pahnih an thi.

Tuensang-a buaina chhuakah hian mipa naupang kum 15 chu hnam pawl pakhatin an that a, phuba lak nan mipa naupang thi ta lamṭangte chuan pawikhawihtute hnampui, police pakhat an that.

Tuensang-ah hian armed police company hnih tirh nghal a ni a, para­mili­tary force te a ṭul anga che chhuak thei turin dah an ni bawk.

Chief Minister TR Zeliang chuan Zirtawpni tlai khan Kohima-ah police leh sorkar official te security meeting a neihpui nghal a, Tuensang-a boruak muan­awm a awm theih nan hma­lak dan an rel a ni.

Mi pahnih thi chhungte hnenah state sorkar chuan zângnadawmna cheng nuai khat ve ve pek an nih tur thu puang a, buaina chhuahna hmun leh a chhehvela silai kawlte chu district thuneitute hnena thehlut vek turin a hriattir bawk.

State sorkar chuan district thuneitute chu buaina chhuahna khaw mipuite chu buaina tipunlun zawnga hma la lo tura thu tiam neih­tir turin a hriattir bawk. Security meeting chuan mi pahnih thihna thlentu buaina chhuichiang turin Special Investigation Team (SIT) din turin DGP a hriattir bawk.

Tuensang district magistrate chuan Code of Criminal Procedure (CrPC ) Section 144 tlawhchhanin Tuensang khua leh a chhehvelah Pathianni zing dar ruk aṭanga hman ṭan tur darkar 36 awh curfew an puang nghal.

District magistrate chuan curfew neih chhungin mipui­te chu pawn chhuak lo turin a hriattir a, dan bawhchhiate chu dan tlawhchhana hrem an nih tur thu a sawi.