Sorkar laipuiin Arunachal-ah airport 6 siam dawn

Sorkar laipui chuan Arunachal Pradesh-a ram venhimna tihchangtlun tumin, airport paruk siam a tum thu a tarlang.

India chuan China ramri kilometre 3,488-a thui a nei a, heng zinga kilometr 1,126 hi Arunachal Pradesh leh China ramri a ni. India hian Arunachal-ah airport pakhat mah a nei lo a, Civil Aviation Minister Ashok Gajapathi Raju Pusapati chuan January 29 leh 30-a hmarchhak state Chief Minister-te meeting a neihpui ṭumin Arunachal-a Tezu airport siam mek chu January 2016-ah hawn hman a nih tur thu a lo sawi tawh a ni.

Tezu airport bakah hian Holangi-ah pawh airport hawn tuma hmalak mek a ni bawk. Holangi airport siam turah hian ram neitu, chhungkaw 145 te'n zângnadawmna chungchangah sorkar nen inhmuhthiam lohna an neih vangin project kalchakpui theih a ni lo a, harsatna chinfel nan inbiakna neih mek a ni.

Tawang, Daparizo, Anini leh Koloriang-a airport pali siam nan thil ṭulte zirchian a ni tawh bawk.