Sorkar laipuiin M'laya-ah skill development centre din dawn

Union Minister of State for Micro, Small & Medium Enterprises Giriraj Singh chuan sorkar laipuiin Meghalaya-ah skill development centre din a tum thu kar kalta Inrinni khan a sawi.

Union Minister chuan centre-ah chuan ṭhalai 5,000 chuangin training an neih tur thu sawiin, Meghalaya ṭhalai 700 velin sector hrang hrang- fruit processing, handicraft leh IT sec­tor-ah training an neih tur thu a sawi.

"Sorkar laipui chuan ṭhalaite tihhmasawn a ngaihpawimawh vangin Meghalaya mite traditional thil, khuai khawi chu hlawk zawka kalpui a nih theih nan tihchangtlun ka duh bawk a ni," a ti.

Union Minister Giriraj chuan hmeichhiate tan solar hmang la hlumna khawl (charka) bun a duh thu a sawi bawk. "India ramah hmeichhia vaibelchhe 50 chuang an awm a, Charka bun sak chu ka project kalpui chak a ni. India ram hmeichhia zinga 10% talin thla khatah cheng 5,000 ṭheuh an lakluh theih ka beisei a ni," a ti.

Prime Minister Employment Generation Programme (PMEGP) chung­chang sawiin Union Minister chuan sorkar laipuiin Meghalaya-ah MPEGP project 1133 kalpui a tum thu a sawi a, heng zinga project 185 chu pawmpui tawh a ni, a ti.

Union Minister Giriraj chuan Assam tan PMEGP project 5111 kalpui an tum thu leh hmarchhak bialah PMEGP project 13337 kalpui an tum thu a sawi.

Union Minister chuan tun hnaia ni hnih chama Meghalaya a tlawh chhung­in state Commerce and industries department official te nen PMEGP kalpui dan ennawnna meeting an nei nghal.