AIUDF-in Congress kaihhruai Ṭangrual pawlah tel a remti

26th August, 2020

Assam-All India United Democratic Front (AIUDF) party chuan nakkuma state assembly inthlan neih tur atan Congress kaihhruai ṭangrual pawl, 'Grand Alliance' dinah tel a remti tih a sawi.

Assam Pradesh Congress Committee (APCC) president Ripun Bora chuan an state-a BJP kaihhruai sorkar chu paihthlak ngei an tum tih a sawi a, AIUDF hian Grand Alliance-ah tel a remtih bakah, Left party dangte pawhin a thuphung chuan zawm an tum thu an sawi tawh bawk a ni, a ti. Anni bakah anti-BJP party din tharte pawhin ṭangrual pawl hi zawm an tum niin Congress party pawh an hrilh tawh a, thutlukna an siam hunah an puang dawn a ni, a ti.

AIUDF organisational general secretary Aminul Islam chuan an party hruaitute chuan Congress hruaitu leh chief minister hlui Tarun Gogoi chu inbiakna an neihpui hnuah, Grand Alliance-a tel hi an rel tih a sawi. Bora chuan Krishak Mukti Sangram Samiti (KMSS) pawh an biak thu sawiin, anni pawhin political party an din thar chu tihfel a nih veleh thutlukna hi an puang dawn tih a sawi. Mahse KMSS hotu Akhil Gogoi hi jail-ah a la tang mek a, KMSS chuan an hotu hi chhuah phutin, a chhuah hunah political party an din thar hming hi puan a ni dawn tih an tarlang.

All Assam Students' Union (AASU) chuan Asom Jatiyatabadi Yuva Chhatra Parishad (AJYCP) nena political party thar an din tur chu ṭangrual pawlah hian a tel dawn lo tih an sawi a, mahse BJP leh a thurualpuite erawh paihthlak an nih theihna atan thawhpuiah an sawm chhunzawm leh tur thu Bora chuan a sawi. Bodoland biala party-te erawh chuan Bodoland Territorial Council (BTC) inthlan neih zawha thutlukna siam an tum. BTC inthlanah hian Congress leh AIUDF chu an thawk dun tawh a ni.

Member 126 awmna, Assam assembly inthlan hi nakkum March -April vel hian neih rin a ni. Rorellai BJP party chu a mala seat nei hnem ber ni mekin MLA 60 a nei a, a thawhpui Asom Gana Parishad chuan seat 14 leh BPF chuan seat 12 an nei bawk. BJP kaihhruai ṭangrual sorkar hi independent MLA pakhatin a thlawp bawk a ni. Eptu party lian ber, Congress chuan member 23 neiin, AIUDF hian member 14 a nei bawk.