October-ah Tripura-a hri leng a zual dawn

Tripura-a state-level COVID-19 core committee chuan an state-a Covid-19 leng mek chu October thlaah a zual hun, a 'peak' a thleng dawn tih an sawi. 

Hri darh tur venna atana test tam zawk tih zel a nih loh chuan, October thlaah hri leng chu thunun theih lohin a awm thei dawn tih an sawi. Ram chhunga hmun ṭhenkhatah hri kai thar hi an tlakhniam ṭan laiin, Tripura-ah chuan kar liam ta chhung khan hri kai hmuh chhuah hi 9% - 10% in a pung zawk thung tih core committee member Dr Tapan Majumder chuan a sawi a ni. 

Dr Majumder chuan Lake Chowmuhani bazar-a random testing neiha sample 46 lakah 26 a positive tih a sawi a,  hri darh tur venna kawnga mipuiten an thawhpui ṭhat loh chuan thunun theih loh hun a thleng thuai dawn a ni, a ti. Chief minister Biplab Kumar Deb chuan Thawhṭanni khan an state-a hri leng dinhmun te thlirin, hma lak zel tur a ngaihtuah. CM chuan test pawh tam zawk nei turin a ti a ni. 

Tripura-ah hian sample 2,44,554 test a ni tawh a, an zinga 8,920 chu an positive a, hri kai zinga mi 79 in an thihpui tawh bawk.