Manipur social welfare minister-in Covid-19 kai
Manipur-a hmeichhe minister awmchhun, social welfare minister Nemcha Kipgen chuan nimin zing khan a official Facebook page-ah Covid-19 a kai tih a sawi.
Kum 57 mi, Kipgen hi Imphal-a Babina Diagnostics-ah a sample test a ni a, hemi hnu hian Kangkokpi district hospital-ah test nawn leh a ni. Minister chuan symptom a neih avangin a in test tih sawiin, a result hi a positive tih a sawi a ni. Hri a kai tih hriat a nih hnuah amah nena tunhnaia inhnaihna lo neite chu inkhung hrang a, in test tir turin a ngen nghal bawk.
August 10-a hri a kai tih hriat, Congress MLA Fd Fauzr Rahim erawh chu enkawl dam a ni tawh a ni. Manipur-ah hian Thawhlehni khan hri kai hmuh chhuah thar mi 116 an awm leh a, an zinga 42 chu security force mi leh sa an ni. Mipuia hri kai hmuh zinga pathum chu state dang aṭanga haw niin, mi dang 71 te erawh chu zin chhuahna nei lo, tualchhung aṭanga kai an ni thung. State pumah hri kai hmuh chhuah tawh hi mi 5,362 an ni a, mi 3,713 chu enkawl dam ni tawhin hri kai mek hi 1,627 an la awm. Sample 1,35,399 test a ni tawh bawk.