Assam-ah municipal leh town committee inthlan neih a ni

Assam-a municipal board leh town committee inthlanna chu nimin khan neih a ni.

Assam-ah hian municipal board 32 leh town committee 42 a awm a, voting centre 1,748-ah vote thlak a ni a, political party hrang hrang leh independent candidate 2,901 an awm.

Voter 14,84,896 awmin, mipa 7,62,302 an ni a, hmeichhe voter 7,22,194 an awm thung. Kum 2009 municipal inthlan aiin vote nei hi 12.06%-in a pung.

Municipal ward 746-ah 32 chu Schedule Tribe (ST) candidate tan dah a ni a, ward sarih chu Schedule Caste (SC) tan dah a ni bawk. Ward 367 chu hmeichhe candidate tan dah a ni bawk.

February 12-ah vote chhiar a ni ang.

Guwahati Municipal Corporation (GMC) leh Barpeta Municipal Board chuan an term, kum nga an la hman zawh loh vangin nimina inthlanna neihah an inthlang ve lo.