NGT-in Kaziranga National Park hnaiha dawr hawn a khap

National Green Tribunal (NGT) chuan Kaziranga National Park (KNP)-a ramsate himna ngaihtuahin, KNP leh a chhehvela ramsate vei­vahna bul, kawngpui sir­ah dawr hawn a khap.

Environmentalist Rohit Choudhury-a'n KNP huamchhunga NH 37 kawngpui zauh tumna a dodalnaa NGT-a petition a thehluh chu NGT Chairperson Justice Swatanter Kumar awmna tribunal bench-in tun hnai khan ngaihtuahin, thu chhuah a siam a ni.

NGT chuan Assam sorkarin ramsate a venghim zo lo chu ngaihthiam har a tih thu tarlangin Assam sorkar chu kum 2013-14 chhunga KNP-a ramsa thi zat hriattirna report thehlut turin a hriattir a, hemi atan hian March 12-ah hearing a ko nghal.

Tribunal bench chuan, "KNP tantlangtu kawngpui, National Highway 37-ah state sorkarin ramsate a venghim ṭha tawk lo a, ramsate hi thilsiam tikimtu an ni a, humhalh ngai a ni. Ramsa tam tak an thih vangin environment-ah nghawng ṭha lo a thlen phah a ni," a ti.

"Kawngpui sirah thil zawrhna dawr leh ei siamna dawr hawn phal a ni lo a, hemi kawngah hian khauh taka hmalak tur a ni. NH 37-a lirthei tlan chak phal chin piah lama tlan thubuai neite tarlanna list kimchang takin in thehlut bawk tur a ni," tiin tribunal bench chuan Assam sorkar a hriattir.