ANVC hel bangte'n chhawm­dawlna dawng dawn

Meghalaya, Garo Hills-a hel pawl, A'chik National Volunteers Council (ANVC) leh ANVC (B) chuan nikum September 24 khan sorkar laipui leh Meghalaya sorkar chu remna thuthlung an ziahpui a, nikum December 15 khan ṭhiah nghal an ni.

State sorkar chuan ANVC hel bangte chhawm­dawl nan cheng nuai hnih leh sing nga ṭheuh pek an nih tur thu a puang.

State Home Department official chuan he thu hi sawiin, hel bangte chhawmdawlna sum chu state sorkar leh sorkar laipuiin an tum tur thu a sawi a, pawisa pekchhuah hmain ANVC leh ANVC (B) hel awm zat zirchian phawt an tum thu a sawi.

State sorkar chuan chhawmdawlna dawng thei ANVC hel bang 300 chuang an awm tih a sawi a, hetihlai hian ANVC (B) hel bang zat erawh zirchian ngai a ni, a ti. Chhawmdawlna pawisa chu dik taka hman a nih theih nan state sorkar chuan sum pek­chhuah dan kawng a ngaihtuah ṭhat a la ngai a ni.

ANVC publicity secretary Arist Sangma chu pawisa chu an bank account-a dahsak ṭha a tih thu a sawi a, an mi leh sa ṭhenkhat chuan sorkar h­na an duh laiin ṭhenkhat­in police-a luh an duh a ti a, ṭhenkhat chu sumdawnna bul ṭan tum an ni, a ti.

Chief Minister Mukul Sangma pawhin hel bangte intundin leh nan ruahmanna siamsak ṭha a tih thu a lo sawi tawh bawk.

Home department official chuan hel bangte hi state sorkarin police-a lak erawh a tum lo niin a sawi.