Nagaland in-service doctor-ten lungawi lohna lantir dawn

Nagaland In-Service Doctors Association (NIDA) chuan August 21-a IRB sipaiin Dimapur-a an thawhpui doctor  kut a thlak avanga lungawi lohna lantirin, tukin dar 6 aṭangin darkar 24 chhung state pumah medical service an titawp dawn.

NIDA President Dr Ritu Thurr leh Secretary Dr Ahu Sekhose chuan rawnga taka sipai chetna an duh lohna lantirna tur a nih thu sawiin, emergency service bik erawh chu kalpui a ni ang, an ti. Nagaland eptu pawl, Naga People's Front (NPF) pawhin IRB patrol party miten doctor kut an thlak chu an dem tak zet tih sawiin, hetianga medical mi leh sa ten police kut an tuar hi a thleng fo tih an sawi bawk. Hei vang hian sorkar chu mipute himna tura hma la a, rawng taka sipaite chetna thleng ṭhin titawp tura an phut thu an sawi bawk.