Arunachal-a by-election atan Rijiju a campaign

Arunachal Pradesh, Liromoba assembly seat by-election neih turah Thawhṭanni khan Union Minister of State for Home Affairs Kiren Rijiju a campaign.

West Siang district-a Liromoba assembly seat by-election hi February 13 hian neih a ni ang a, February 16-ah vote chhiar a ni ang.

Rijiju chuan Darak leh Kamba-a rally-ah thu sawiin, BJP candidate Bai Gadi chu thlang tling turin mipuite a ngen.

"Central-a NDA sorkar chuan Arunachal Pradesh a ngaipawimawh a, BJP candidate in thlan tlin chuan sorkar laipuiah thuchah pawimawh tak in thawn tihna a ni ang," a ti.

Hetihlai hian Arunachal BJP chuan Congress kaihhruai state sorkar chu Kamba-a BJP rally neihna tur, pandal tihchhiatsakah an puh.

"Democracy kalphungah chuan inthlannaa tel hi mitin dikna leh chanvo a ni a, campaign pawh democracy kal­phung pakhat puitlinna a ni a, midangte campaign dal zawnga hmalakna hi inthlan kalphung tenawm tak a ni," tiin state BJP thuchhuak chuan a tarlang.

Liromoba assembly seat by-election atan hian BJP leh Congress party candidate bakah independent candidate pathum an awm.

1. Bai Gadi- BJP

2. Nyamar Karbak- INC

3. Johny Tali- Independent

4. Lijum Ronya- Independent

5. Raksap Yomcha- Independent

Liromoba bialah hian voters 11640 an awm a, polling station 54 hawn a ni ang.

Kum 2014 Lok Sabha intlan neih ruala state assembly inthlanah Congress candidate Jarbom Gamlin chuan vote 5483 hmuin, vote 4179 hmutu BJP candidate Bai Gadi chu vote 1304-in a hneh.

Congress MLA Gamlin (53) hi nikum November 30 khan a boral a, a hmun ruak hnawhkhah nan a bialah inthlan ṭhat neih a ni dawn a ni.