Assam sorkarin NRC draft Nov-ah a tlangzarh dawn

Assam sorkar chuan National Register of Citizens (NRC) siamṭhat hna a kalpui tur chu November thla hian a draft tlangzarh hman a tum thu a tarlang a, nakkum January hian a pumpuia peihfel hman a beisei thu a tarlang bawk.

NRC update-na atan state sorkar chuan senso-ah cheng vaibelchhe 498 a mamawh tur thu sorkar laipuiah a thlen tawh bawk. NRC update hi sorkar staff 30,000 chuangin an buaipui ang.

NRC state coordinator Prateek Hajela chuan, "NRC update-na atana kan hma­chhawpte chu tun aṭanga kar hnih hian kan tarchhuah theih kan beisei a, draft NRC chu November thla hian tlangzarh hman kan tum. Draft kan tlangzarh hnuah sawisel ngai leh siamṭhat ngaite thla khat chhung buaipui leh a ni ang a, chumi hnu, January thlaah final NRC chu tlangzarh kan tum a ni," a ti.

"NRC upadate-na atan sorkar laipuiah cheng vaibelchhe 498 kan dil a, hemi aṭang hian vaibelchhe 140 kan hmu tawh a, sum kan la hmuh lohte pawh a hun taka kan dawn kan beisei," a ti.

Hajela chuan NRC update tur chung­changa mipuite hriattirna chu TV leh newspaper advertisement hmanga an tarchhuah a nih tawh thu sawiin, website leh helpline pawh an siam tawh thu a sawi bawk.

NRC state coordinator Hajela chuan NRC awareness campaign chu February 16 aṭangin thingthlang khaw eng emaw zatah neih an tum thu a sawi bawk a, campaign an zawh hnuah update hna thawh ṭan an tum thu a sawi bawk.

Assam-a NRC update hi India khua leh tui dik tak chhinchhiahna atana ruahman a ni a, kum 1971, March 25-a electoral roll tihchhuah behchhanin NRC hi buatsaih tur a ni.