Tripura assembly-ah member te inhnial buai

Tripura assembly session neih mekah Thawhṭanni khan chit fund sum chingpen chungchang sawi ho a ni a, Chief Minister in-charge Badal Chowdhury-a chhannaa lungawi lo eptu member te chuan an lungawi loh thu auchhuahpuiin inhnial buaina a thleng zui nghal.

Rorel theih a nih loh avangin Speaker Ramendra Chandra Debnath chuan minute 15 chuang inkhawm a titawp a ni.

Chowdhury chuan Congress MLA pahnih - Ratan Lal Nath leh Gopal Chandra Roy-a'n chit fund sum chingpen chungchang­ah ziak­a zawhna an thehluh chu chhangin state sorkarin chit fund sum chingpen thubuai 32 chu CBI chhuitir turin a ngen a, mahse CBI chuan thubuai panga chauh chhui zui atan a pawm a ni, a ti a, state sorkar chuan CBI chu thubuai dang pawh bawhzui turin a ngen leh thu a sawi bawk.

Chowdhury-a chhannaa lungawi lo eptu hruai­tu Sudip Roy Bar­man chu lo ding­chhuakin, Chief Minister Manik Sarkar leh a cabinet te chu Tripura-a sum peipunna promote-tuah a puh a, Non-Banking Financial Company (NBFC)- Rose Valley, Waris Financial Institution leh Saradha Group te'n mimal sum an tihchingpensak zat hriattir turin state sorkar a phut a ni.

Chowdhury chuan, chit fund sum chingpen kaih­hnawih lehkha pawimawh zawng zawng chu CBI chhui atana an kut­ah an hlan vek thu a sawi a, hemi hnu hian inhnial buaina a chhuak zui ta a ni.