Assam municipal board inthlanah vote 72.7% a tla

Assam-a municipal board leh town committee 74-a ward 743-a in­thlanna neihah Thawhṭanni khan vote 72.7 % a tla.

Assam State Election Commissioner H N Bora chuan vote thlak chu tluang taka zawh a nih thu sawiin, vote tla percent hi data peihfel a nih hnuah a la san theih thu a sawi bawk.

Inthlanah hian candidate 2,901 an awm a, naktukah vote chhiar a ni ang.

Bora chuan Hojai municipality ward no. 2-ah vote thlak ṭhat a ngaih thu a sawi bawk a, vawiin hian vote thlak a ni ang.

Assam-a political party lian pathum- Congress party president Anjan Dutta, BJP president Siddhartha Bhattacharya leh AGP president Atul Bora te chu tun hnaia thlan thar vek an ni a, municipal board inthlan hi an kaihhruaina hnuai­a an party te'n inthlan an hmachhawn hmasa ber a ni bawk. Hei vang hian political observer te chuan Thawhṭannia in­thlan hi nakkum assembly inthlan neih tura political party te enchhina leh fiahna tiin an sawi.

Kum 2009-a municipality ward 696 inthlanah Congress chuan ward 425-ah hnehna a chang a, AGP-in ward 102 lain, BJP-in ward 66-ah hnehna a chang thung a, CPI(M)-in ward 2 an la bawk a, independent candidate te'n ward 101 an la bawk.