Bodo Accord ennawn a ni ang : Rijiju

Union Minister of State for Home Affairs Kiren Rijiju chuan Bodo mipuite'n Bodo Accord hamṭhatna an tel theih nan ennawn a nih tur thu a sawi.

Assam, Kokrajhar-a Bodoland Day vawi 13-na lawmnaah thu sawiin, Bodoland bial mipuite'n kawng tin renga hmasawnna an neih theih nan an harsatnate sorkar laipuiah thlen a tum thu a sawi.

Rijiju chuan hel pawlte vang­a dan leh thupek din­hmun tla­chhiate siamṭhat nan state sorkar pawh theihtawp chhuaha bei tura ngen a tum thu a sawi bawk a, sorkar laipui chuan hemi kawng­ah hian theih­tawp chhuaha a thlawp tur thu a sawi bawk.

Union Minister chuan Bodo­land bialin ram leilung hausakna nei ṭha mah se hna­thawktu (human resource) an tla­chham a ti a, heihi sorkar laipuiin a ngaipawimawh thu a sawi. Harsatna chinfel nan sorkar laipui chuan kawng dik a zawh chho mek zel a, Sixth Schedule huam­chhunga awm­te hnena sorkar laipui fund tihkhawtlai a nih loh nan sorkar laipuiin thil ṭulte a bawhzui mek a ni, a ti.

Union Minister Rijiju chuan Bodoland chhehvela chi leh chi inkara buaina chhuak ṭhin chu ṭha a tih loh thu sawiin, remna leh muanna tel loin ramin hma a sawn thei lo, a ti a, dodal leh beih ngai zawk chu phalna nei loa a ruka pêm lutte an ni, a ti.

Rijiju chuan kum 2019 Lok Sabha inthlan neih hmain Prime Minister Narendra Modi kaihhruai sorkarin hmarchhak hmel thlak danglam a tum thu a sawi bawk a, rampum hmasawnna project-ah hmarchhak bial telh a nih tur thu leh India ram state dangte nena hmar­chhak bial inkar zau lutuk tihzim an tum thu a sawi bawk.