Union Minister Bharati-i'n Arunachal ṭanpui a tiam
Union Water Resource Minister Uma Bharati chuan a ministry aṭangin Arunachal Pradesh chu theihtawp chhuaha ṭanpui a tiam.
Union Minister Bharati hian tunhnai khan Arunachal Pradesh Chief Minister Nabam Tuki leh senior minister te nen meeting neiin he thu hi a sawi a, Arunachal chuan hmasawnna kawng dik a zawh mek thu leh a ministry-ah ṭanpuina an dil a nih chuan theihtawp chhuaha a bawhzuisak tur thu a sawi.
Chief Minister Tuki chuan loneitute'n ramngaw behchhana lo an siam tihbo nan leh ramngaw tihpun nan state sorkarin nasa taka a beih thu Union Minister Bharati a hrilh a, hemi kawngah hian loneitute'n tui kawng (irrigation) ṭha an mamawh thu a sawi.
CM Tuki chuan kum 2015-16 chhunga Accelerated Irrigation Benefit Programme kalpui nan cheng vaibelchhe 200 a dil nghal bawk a, Command Area Development leh Water Management programme atana sorkar laipuiin state tinte hnena a sum a pek dan, 50:50 ratio chu 90:10 ratio-a kalpui turin Union Minister a ngen bawk.
"Arunachal chu tlangram chhengchhe tak a nih vangin phai ram state te aiin Command Area Development leh Water Management programme-ah sum a mamawh tam zawk a ni," a ti.
Arunachal Chief Minister chuan irrigation leh tui in tur mamawh phuhruk nan lei hnuaia tui awmte laichhuaka, tuichhunchhuah hmanga hman a nih theih nan Union Water Resource Ministry chu special programme duang turin a ngen bawk.