DoNER-in Thlawhtheihna service mumal lo bawhzui dawn

Hmarchhak state hrang hranga thuneitute'n hmarchhak biala thlawh­theihna service mumal lo lutuk chu vawi eng maw zat an sawisel hnuah Ministry of Development of North Eastern Region (DoNER) chuan harsatna bawhzui nan Ministry of Civil Aviation nen meeting neih a tum.

DoNER minister Jitendra Singh chuan he thu hi sawiin, hmar­chhak biala rel leh lirtheia inkalpawhna ṭhat loh laia thlawhtheihna service mumal lo chu chinfel thuai a nih theih nan Civil Aviation Ministry nen inter-ministerial meeting neih an tum thu a sawi.

Singh chuan tun hnai khan Union Ministry of Tourism chu tun hnai khan inter-ministerial meeting an neihpui thu sawiin, ministry pa­hnih ṭangrualin Standing Committee an din thu a sawi. Committee chuan hmarchhak state te sum hnar siam nan leh ṭhalai hna nei lote hna siamsak nan khualzin leh filmmaker tam zawk hip dan tur a ngaihtuah ang.

DoNER Minister Singh chuan tun hnai khan Delhi-a hmarchhak mi, sorkar department hrang hranga officer te inkhawm a hmanpui a, officer te chu hmarchhak bial hmasawn nan theih­tawp chhuaha DoNER ministry thawhpui turin a sawm.

"DoNER Ministry chuan mawhphurhna chi hnih a la a, pakhat chu hmar­chhak bial hmasawnna project bawhzui a ni a, a dang chu hmarchhak state leh India ram state dangte inkar zau lutuk tihzim nan a tlunzawm hna thawh a ni," a ti.

Hmarchhak state zir­laite'n lehkha zir nana state dang an bawh nasa lutuk tihtlem nan Singh chuan hmarchhakah sports university, agricultural college leh zirna-in dang hawnbelh an tum thu a sawi bawk a, hemi rual hian Delhi-a hmarchhak zirlaite tan Jawaharlal Nehru University leh Ramanujan college campus-ah hostel hawn an tum thu a sawi bawk.