Meghalaya-ah Assam lirthei dang, AASU leh KSU-in an dem

Hynniewtrep National Youth Federation (HNYF) chuan Assam lirtheite chu kar liam ta Zirtawpni khan Umtyngngar-ah dangin, Meghalaya-a khualzin tlawh ṭhin hmun ṭhenkhat tlawh an phal lo. HNYC chet dan hi All Assam Students' Union (AASU) leh Khasi Students' Union (KSU)-te chuan an dem takzet tih an tarlang.

HNYF-in Assam-a register lirthei an dan zinga a tam zawk chu khualzin phurtu lirthei an ni a, Meghalaya chhunga khualzinte tlawh ṭhin hmun hmingthangte tlawh tumtute an phur a ni. Heng mite hi Umtyngngar-ah lo dan niin Sohra leh Dawki pan tumte pawn an tum ram an thleng thei ta lo a ni. Umtyngngar-a dan an nih avang hian Khualzinte phurtu lirthei ṭhenkhat chu Shillong lamah hian an kir leh a ni.

East Khasi Hills SP, Sylvester Nongtnger chuan HNYF mi leh sa 10 chu khualzin phur lirthei an dan avang hian an lakah thubuai ziah luh a ni tih a sawi.

AASU leh KSU-te chuan Meghalaya-a Assam lirtheiten harsatna an tawh hi an dem tih sawiin, an buaina hi chinfel thuai a ngai tiin thuchhuah an siam.

State pahniha taxi association-te inkarah buaina chhuak lo se an duh tih AASU leh KSU chuan tarlangin inhriatthiam tawnna neihn a ngai tiin an sawi bawk. Tun hnaiah All Khasi Meghalaya Tourist Association chuan state sorkar hnenah state dang motor, khualzin phur chu Meghalaya luh khap turin an lo ngen tawh a, hemi kal zelah hian HNYF hian hma an la zui nia rin a ni. Association in a tarlan danin an state-a tlan lut, tourist vehicle 3,543 zinga 2,437 hi state dang ami niin, an state motor chu 1,106 chauh a awm niin an sawi.

"AASU leh KSU hian ṭual ṭo hnam- Assamese leh Khasi te humhim leh dam khaw chhuah nan hman aṭangin an bei ṭhin a, hei hi chhunzawm zel pawh kan tum a ni" tiin thuchhuah an siam. State pahniha sorkarte chuan buaina ching fel turin hma la se an duh tih an tarlang bawk.