MDoNER-in hmarchhak hmasawnna sawi ho

Ministry of Development of North Eastern Region (DoNER) chuan Vigyan Bhawan Annexe, New Delhi-ah webinar buatsaihin thupui atan “Accelerated Development of North Eastern States” tih an hmang.

Chanchal Kumar, MDoNER secretary chuan sum leh pai dinhmuna hmarchhak hmasawnna tarlangin, Gross Domestic Product a ṭhan thu a sawi a, sorkar kum hmasa aiin fiscal deficit pawh a tlahniam a ni, a ti. Hmarchhak pumpui tana hmasawnna ruhrel dinna atana sum theh chhuah chu Rs vbc nuai 11.11 a ni tih sawi bawk. Heng sum hmang hian inkalpawhna ṭha zawk an neih an beisei tih Kumar chuan a tarlang.

MDoNER secretary Kumar chuan project thawh mekte chu a hun taka zawh tum a nih tih tarlangin, heng project atana sum ruahmante pawh tikhawtlai loa pek chhuah tum a nih thu a sawi. Hmarchhak huam chhunga chak zawka hna thawh a nih theih nan project chu rang zawka pawmpui a ngai a, hemi tur hian digital technology pawh a ṭul dan a zirin hman a ni dawn tih a sawi.

Dr Sukanta Majumdar, Minister of State for DONER chuan hmarchhak tana central ministry leh department-ten kum 2014-15 leh 2023-24 inkara sum an theh chhuah chu Rs vbc nuai 5.22 a ni tih a sawi. Hmarchhaka hmasawnna ruhrel din nan bakah khawtlang hmasawn nan leh mipuite hmasawn nan PM-DevINE chu a ṭangkai hle tih a sawi bawk. Hmeichhia leh ṭhalaite bakah SC leh ST-te hmasawn nana Rs vbc 5,900 dah chu hmarchhak mipuiten an chhawr ṭangkai ngei a beisei bawk.