Brahmaputra Board thlakna siam a ni ang : Union Minister Bharti

Union Minister for Water Resources Uma Bharti chuan Brahmaputra Board chu institution thara thlak a nih tur thu sawiin, a hming leh a kalphungte pawh thlak a nih tur thu a sawi.

Bharti chuan Nilaini khan Shillong-ah Brahmaputra Board hnuaia High Powered Review Board meeting kaihruaiin, meeting zawhah he thu hi a sawi. Meeting-ah hian Union minister of state for home affairs Kiren Rijiju, Meghalaya chief minister Mukul Sangma leh hmarchhak state tina water resources minister te an tel.

"Vawiin hi Brahmaputra Board meeting tawpna a ni tih chiang takin ka sawi thei a, meeting neih leh hun chuan board-in hming thar leh kalphung thar a nei tawh ang a, state tinte ngaihdan lak a ni tawh ang," tiin Bharti chuan chanchinthar thehdarhtute a hrilh.

Brahmaputra Board hi lui tui sawngbawlna leh tui lianin chhiatna a thlen theih laka invenna lam ngaihtuah tura din a ni a, mahse tun hnaiah a mawhphurhna tam tak a hlen zawh loh avangin sawisel a hlawh hle.

Union Minister Bharti chuan, "Board thlakna siam a nih chuan beiseina thar kan siam leh dawn a ni. Tunah chuan technology thiamna lam pawh a dang­lam tawh a, kalphung thar siam­na atan Brahmaputra lui kaihhnawih thila inhnamhnawih zawng zawngte ngaihdan lak a ni ang a, mipuite beiseina hlen­chhuah nan kalphung ṭha kan duang dawn a ni," a ti.

Bharti chuan board kalphung thar siam bakah water resource ministry hnathawh leh scheme kalpui mekte mipuiin an hriatchian theih nan a ministry chu internet lama thehlar a tum thu a sawi bawk.

Bharti chuan Union Minister Rijiju leh Meghalaya CM Mukul-a'n Brahmaputra lui chu an ngaihpawimawh thu sawiin, river basin management siam an rawt thu a sawi.

"Hmarchhak stateṭhenkhat leh West Bengal chu Brahmaputra luiah a innghat nasa hle a, hei vang hian luiin harsatna a thlen - tui lian, leimin leh lei ṭha kalral ṭhinte chu ngaihthah chi an ni lo tih ka hria a ni," a ti.

Hmarchhak bial lui hrang hranga tuikhuah lian tak tak siam tumna mipuite'n an dodal ṭhin chungchangah Bharti chuan ei leh bar dinhmun bakah a technical thil lam ringawt ni loin mipui­te rilru sukthlek vanga dodalna thleng ṭhin nia a hriat thu a sawi a, power ministry chuan hmar­chhak mite rirlu sukthlek chu a ngaipawimawh a ni, a ti.

Brahmaputra lui thenfai chungchanga chanchinthar theh­darhtute zawhna chu chhangin, Ganga leh Brahmaputra chu lui hnar inṭawm an nih avangin Ganga lui thenfai hnathawhin Brahmaputra luiah nghawng a neih tur thu a sawi a, Ganga lui thianfai tura an ruahmanna siam chu lui dangah pawh kalpui thuai a nih tur thu a sawi bawk.