Delhi-a AAP hnehna India tan a pawimawh: Tripura CM Sarkar

Tripura Chief Minister Manik Sarkar chuan Delhi assembly in­thlana Arvind Kejriwal-a kaihhruai Aam Aadmi Party (AAP)-in hnehna an chan chu a lawmpui thu sawiin, AAP hnehna chan chu India ram tan a pawimawh a ni, a ti.

"APP hnehna chan chu BJP-in mipui sukthlek an hriatna atan a ṭangkai a, inthlan neih hmaa mipuite hnena thutiam neih ringawt hi political party te'n hnehna an chan theih nan a tawk loh zia a lang a ni. Thutiam chu a taka tihpuitlin a nih loh chuan mipuite'n tumah an ring ngai lo, hei hi Delhi inthlan aṭanga BJP leh Congress zir tur a ni," a ti.

Tripura CM Sarkar chuan, "Nikuma Lok Sabha inthlan neih hnuah BJP-in state ṭhenkhat assembly inthlanah hnehna an chang chhunzawm zel a, chu vang chuan an inringtawk lutuk hret a, an thiltih zawng zawng pawm vek turah mipuite an ngai a, mahse chutiang chu a ni si lo. Prime Minister Narendra Modi chuan mipui­te hnena a thutiamte a ennawn a ṭul a ni," a ti.

Kumina Delhi assembly inthlanah BJP vote hmuh zat hi kum 2013-a assembly inthlan aṭangin 1% velin a tlahniam a, Congress vote hmuh 8%-in a tlahniam bawk a, hetihlai hian AAP vote hmuh erawh 25%-in a sang thung.

"Kum 3 chhunga Delhi-a Kejriwal thiltih chu CPI-M-in kum 10 chhungin a ti thei lo tih ka pawm a, tun ṭuma Delhi inthlanah pawh CPI-M chuan candidate pathum kan thehchhuak a, inthlan result chu beisei ang a ni. Mahse thil pakhat ka sawi duh chu CPI-M chu inthlana chak tur chauhin inthlan kan chuh ngai lo. Inthlanna chu kan party kalphung leh thuvawn tlangzarhna hunah kan hmang ṭhin," tiin Sarkar chuan a sawi.

APP chu India rama left party paruk, tuna BJP leh Congress dodaltute thawhpuitu a ni thei ang em tih chu Delhi sorkar tana Kejriwal hnathawhin a hril ang, tiin a sawi bawk.