Tripura-ah zirlai naupang 300 chuang damdawi-inah dahlut
Tripura hmar lam Dharmanagar district-ah Nilaini khan school naupang 300 chuang chu damdawi-inah dahluh an ni.
School hrang hranga zirtirtute'n an zirlaite hnena rulhut damdawi an pek hnuah zirlaite hian âwm nâ leh thaw lama harsatna an nei zui nghal nia sawi a ni.
Zirlaite hi pawl 5 leh pawl 9 inkar an ni hlawm a, doctor te'n an enfiah hnuah Dharmanagar district divisional hospital-a dahluh nghal an ni.
District Magistrate Sandip R Rathore, sub-divisional magistrate Sankar Debnath leh Superintendent of Police Abhijit Saptarshi te chuan zirlaite chunga harsatna thleng chu a hmunah awmchilhin an bawhzui nghal a, zirlaite damdawi ei hnathawh that thei tur damdawi ngaihven a nih bakah Agartala aṭangin medical team chah a ni bawk.
Worm-free India siamna atana National De-worming programme tihpuitlinna atan zirlaite hi rulhut damdawi pek an ni.
Union Health Minister JP Nadda chuan February 10 kha National De-worming Day-ah a lo puang tawh a, India rama naupangte chu rulhut lak aṭanga venhim an nih tur thu a lo sawi tawh a ni.